HOMMAGES

 

 

 

Homaige de Marin Gaillard a feu Jean de Peyre habitant a Montmorin

 

Au nom de dieu amen Soict notoire et

Magnifeste a Ung ch(ec)un que ce jourdhuy troisie(sme) jour du

mois de may apres midy mil six centz et Cinq par

devant moy note(re) Royal dalphinal et en presance des

Tesmoingz cy apres nommes Estably en personne Marin

gaillard a feu jean natif de peyre habitant a Montmorin

en Gappencois de son Gre pour Luy et les siens hoirs et

sucesseurs quelconques aladvenir ayant aprehande

en personne Noble et Puissant Seigneur Anth(oine) dela

Riviere seigneur de brueys et montmorin Cest mis

a Genoulx par dvant luy a Teste nue a mains

jointes baisant les poulses en signe dhumillite

amour et fidellite Cest faict son subject et juridiciable

en sa place [mot ray] parvis et juridi(ct)ion dud(it) montmorin

et les siens aladvenir et promet luy estre bon et feal

subject hobeyir a sa justice Cuire son pain et moudre

ses bledz aux molin et four dud(it) seigneur et paier

tout ce qui est porte et contenu aux sept cas

Imperiaulx quest deubt cense quand Lun ou

plusieurs diceulx cas adviendront Item

paier la cense anuelle et personnelle quest Ung Ras

gros bled deux cyvaiers froment et deux souls

argent

et pour le fournage pour ch(ec)une personne

de sa Maison ayant sept ans et au dessus deux

cyvaiers froment et deux cyvaiers gros bled le Tout

a la mesure de montmorin [mot ray] bon bled

marchand et Recepvable et de cense Payable a ch(ec)un

Jour et feste de la Toussaintz et ainsin continuants

anuellement aud(it) seigneur ou siens aladvenir

Randue et portee dans la Maison et ch(ate)au dud(it)

Seigneur aud(it) montmorin Item deux courvues de

boeuf sil a boeuf et sil na boeuf de sa personne

anuellement et tous les ans Lune aux semailles

des bledz yvernaulx et laultre aux semailles des

bledz transaillans a la charge que Led(it) Marin Gaillard

sera tenu venir servir led(it) seigneurs ou siens aladvenir

Tous les ans a son Requis pour le payement desd(ites)

deux Courvues et moyenant Icelles Led(it) seigneur

et en le servant seratenu nourrir led(it) marin

gaillard et aultrement Tout ainsin que ses aultres

subjectsdud(it) montmorin Item Led(it) Marin Gaillard

sera tenu moudre ses grains comme cy devant est

dict au molin dud(ict) seigneur etpaier le droit de

moulture acoustume [mot ray] quest la Vingtie(sme) partye

desd(icts) grains quil fera moudre et au moien de

ce Led(ict) seigneur a donne et donne aud(ict) gaillard

aultant de libertes et privilleges sur sa terre qu'a

ses aultres subjectz Prometant Led(ict) Marin Gaillard

aud(ict) seigneur de luy estre et les siens aladvenir bon et

feal subject et de ne Relever ses secretz avec les

proffict et advantaige dud(ict) segneur procurer de

Tout son pouvoir et scavoir et lhors quil aura

cognoissance que quelque chose prejudiciable aud(ict)

Seigneurs et siens aladvenir len advertir; et en

considera(ti)on de Tout ceque dessusLed(ict) seigneur

promet le Garentir maintenir et soustenir envers

et contre tous et leGarder doppression et Ingure

Prometant et jurant Lesd(ictes) parties contrahantes

avoir le presant acte dhomaige agreable ferme

stable garder et icelluy observer de poinct en poinct

sellon sa forme et Teneur et a ces fins Lesd(ictes) parties

ont soubmis et oblige Tous leurs biens presans

et advenir et le(dict) Marin gaillard sa personne par

emprisonnement dicelle a Toutes Cours Royalles

dalphinalles de Gap du buys et ordinaire des

parties et sur ch(ec)une dicelles seule et Renon(ce)

a Tous droitz loix par lesquelles pourroient

Venir au contraire et ch(ec)une partye a Requis

acte Qu'a este faict et publie a Montmorin dans

la Maison et ch(ate)au dud(ict) seigneur enpres la chambre

ou Il habite entrand a plain pied en presances

de Guis Givoudan honnora Tenour et M(est)re Reymond

faure dud(ict) montmorin Tesmoingz Requis et appelles

on(t) signes les scaichans escripre Led(ict) Gaillard a dict

ne [lettre raye] Le scavoir sur ce enquis et demoy Gabriel

gielly note(re) Royal dalphinal Recepvant soubs(ig)ne

 

 

 

 

 

 

Hommage de Gaspard Gubert

 

 

Lan Mil six Cents trante sept et Le dix septie(esme) Jour du mois daoust apres midy par devant moy note(re) royal hered(itai)re et les tesmoings cy appres nommes constitue en sa personne gaspard gubert fils de Jaume natif de sainte marie habitant a bedarides au Conte de Venisse lequel de son gre pour Luy et les Siens a ladvenir considerant que dans le Lieu dud(it) bedarides Il na moien de gagner son pain pour ny avoir aulcuns biens et desirant dabiter aud(it) Lieu de sainte marie

Croyant y avoir plus de Comodittes que au(dit) bedarides auroict supplie noble gaspard de la riviere seigneur dud(it) ste marie de luy permettre dabiter aud(it) Lieu et dans sa terre et le recepvoir au nombre de ses subjets et Juridisiables se que par ledit seigneur entandu y auroict acorde et tout a linstant ledit Gaspard gubert en signe dumillitte se seroict mis a genoux devant ledict seigneur les mains Jointes teste nue besant les poulces dud(it) seigneur promettant luy estre bon et fidelle subjet ne relever aucunemant ses secretz procur(er) son bien esvitter son domage ne tenir aucune assamblee Illissitte ny monopolle contre la personne et Interets dud(it) seigneur obeir a sa Justice et Recognoistre ses officiers Cuire a ses four Moudre a son Mollin en paiant la mouture et fornage et Cences personnelles et Courvees tout ainsin et a la forme de recognoissances generalles et particullieres faites par tous les habitantz dud(it) lieu sans Inouver aucunemant a Icelles promettant en effait de ce de paier lesd(ites) Cences tous les ans de beau bled monde et de Resepte randu et porte au Ch(ate)au dud(it) (dudit) seigneur au Jour et feste de tous les saintz et les courvees au requis dud(it) seigneur sil na boeuf de sa personne et sil a boeuf de mesmes et au moien de se ledict seigneur la resu au nombre de sesd(its) subjets et Juridisiables et luy a donne toutes les libertes et pouvoir dedans sa terre tout ainsin que les autres habitans ont sans aucune Reserve ny esan(pci)on et pour lobserva(ci)on de tout ce que dessus ledit gubert a sousmis et oblige tous ses biens presantz et advenir et par Emprisonnemant de sa personne quil a sousmis et obliges a toutes cours royalles du balliage de gap ord(ine)re dud(it) ste marie et a Une Checune seul le comme ainsin La promis et Jure et Renonce a tous droitz contraires fait et publie aud(it) ste marie dans la grande salle du Ch(ate)au dud(it) seigneur aux presances de M(aistres) Jean begue et guilhen gros dud(it) ste marie tesmoings requis et appelles soub(sig)nes ledict begue avec

 

Ledict seigneur ledict gubert et gros nont seu escripre de ce enquis adverty de faire seller dans le temps de ledict et moy note(re) royal hered(itere) Resep(van)t soub(sign)e

 

Gielly

 


 

 

 

cigale accueil.jpg